這個太極班最初由康文署開辦，當年啟業邨才剛入伙，邨內康樂活動欠奉，便想出在籃球場開班教太極。「原本反應麻麻，得小貓6、7 人上堂差點被殺班，幸好慢慢建立口碑，一傳十、十傳百，學員人數回升至廿多人才『有得留低』。」陳淑卿是資深武術太極教練，年青時已擔任康文署註冊太極導師，先後在多個屋邨開班授徒，退休後她依然活躍，見康文署停辦啟業太極班，便索性留下來繼續義教，「教開有感情，同啲街坊都熟晒，而且佢地又咁鍾意學嘢，點捨得就咁就完。」她家住秀茂坪，每朝6點多便要坐車出藍田再轉小巴來啟業邨授課，路途雖轉折，幾十年來卻依舊風雨不改，「唔係因為呢個籃球場聚到咁多街坊，我諗我都唔會喺度教到30幾年。」

這個籃球場，的確見證著上世紀公共屋邨規劃的發展變遷；由70年代初開放式平台設計，到80年代新式綜合大樓；啟業邨於1981年入伙，正好趕上潮流在邨內建上一棟集街市、商場、停車場及頂層有蓋球場於一身的綜合式大樓。這種有蓋球場勝在樓底超高，加上四面只以鐵籠包裹，感覺通風開揚，又避免日曬雨淋，「啲街坊一得閒就落嚟，就算唔做運動，坐吓、傾吓計都好，打風落雨一樣無有怕。」陳師傅說，全盛時期來打太極的街坊多達70、80人，差不多逼爆整個籃球場，加上邨內康體設施其實不算多，打籃球、親子活動、打躉吹水的都會上來籃球場，人氣可說盛極一時，只是直至幾年前，管理公司因天雨積水怕街坊跌倒要求停辦太極班，受街坊大力反對，最後經多番調停才得以繼續，「換到別處上堂，啲街坊嫌遠唔嚟，少咗機會耍太極做運動，都無咁健康。啟業邨老人家比較多，更需要更多設施給他們見見人、伸展一下。」